श्री गुरु गोरक्षनाथ आषाढी वारी पायी दिंडी सोहळा ३२ शिराळा भक्तिमय वातावरणात प्रस्थान; “ज्ञानोबा-तुकोबा”च्या गजरात पंढरपूरकडे वाटचाल
श्री गुरु गोरक्षनाथ आषाढी वारी पायी दिंडी सोहळा ३२ शिराळा भक्तिमय वातावरणात प्रस्थान; “ज्ञानोबा-तुकोबा”च्या गजरात पंढरपूरकडे वाटचाल
कोल्हापूर जिल्हा प्रतिनिधी श्री शंकर कुंभार – आषाढी एकादशीनिमित्त दरवर्षीप्रमाणे श्री गुरु गोरक्षनाथ मठाच्या वतीने आयोजित करण्यात येणाऱ्या श्री गुरु गोरक्षनाथ आषाढी वारी पायी दिंडी सोहळा ३२ शिराळा यंदाही अत्यंत भक्तिमय वातावरणात आणि हरिनामाच्या अखंड गजरात उत्साहपूर्ण प्रस्थान झाले. शेकडो वारकरी, भाविक आणि ग्रामस्थांच्या उपस्थितीत “ज्ञानोबा-तुकोबा”, “विठ्ठल विठ्ठल जय हरी विठ्ठल” अशा नामघोषांनी संपूर्ण परिसर भक्तिरसात न्हाऊन निघाला.या दिंडी सोहळ्याचे नेतृत्व श्री गुरु गोरक्षनाथ मठाचे मठाधिपती तसेच श्री गुरु गोरक्षनाथ आषाढी पायी वारी दिंडी सोहळ्याचे सर्वच हरिभक्त व स्वयंसेवक माता भगिनी यांनी केले. यावेळी ह.भ.प. सदाशिव कुंभार महाराज मांगलेकर तसेच श्री गुरु गोरक्षनाथ वारकरी शिक्षण संस्था संस्थापक हरिभक्त ह भ प नवनाथ कुंभार महाराज यांच्यासह असंख्य वारकरी संप्रदायातील अनेक मान्यवर उपस्थित होते.
दिंडीत वारकरी, माळकरी, विणेकरी, टाळकरी, मृदंगवादक, चिपळीवादक, माता-भगिनी तसेच संस्थेचे पदाधिकारी मोठ्या संख्येने सहभागी झाले होते. भगव्या पताका, टाळ-मृदंगाचा निनाद आणि विठ्ठल नामाच्या अखंड गजराने संपूर्ण परिसर भक्तिमय झाला होता.यंदाची ही दिंडी देहू – आळंदी मार्गे पंढरपूर असा पवित्र प्रवास करणार असून, वाटेत विविध ठिकाणी हरिनाम सप्ताह, कीर्तन, भजन आणि धार्मिक कार्यक्रमांचे आयोजन करण्यात आले आहे. ऊन, वारा, पाऊस यांची कोणतीही तमा न बाळगता वारकरी अत्यंत श्रद्धा, भक्ती आणि समर्पण भावनेने विठुरायाच्या भेटीसाठी पायी मार्गक्रमण करीत आहेत.हा दिंडी सोहळा यशस्वी करण्यासाठी सर्व दानशूर व्यक्ती, सेवाभावी कार्यकर्ते, संस्थेचे पदाधिकारी आणि असंख्य भाविकांनी मोलाचे सहकार्य केले. त्यांच्या योगदानाबद्दल मठाच्या वतीने कृतज्ञता व्यक्त करण्यात आली
