धक्कादायक – उत्तम नकातेंच्या ‘प्रेता’ने जागवलं प्रशासन : वाटंबरेत मेल्यानंतरच साहेबांना ‘कर्तव्य’ आठवलं.
धक्कादायक – उत्तम नकातेंच्या ‘प्रेता’ने जागवलं प्रशासन : वाटंबरेत मेल्यानंतरच साहेबांना ‘कर्तव्य’ आठवलं.
सांगोला प्रतिनिधी शशीकांत कोळी. सांगोला तालुक्यातील वाटंबरे गावात अवैध दारू विक्रीने पहिला बळी घेतला आहे. अकोला येथील 70 वर्षीय उत्तम दामोदर नकाते यांचा अतिमद्यप्राशनाने उपचारापूर्वी मृत्यू झाला. ही घटना काल बुधवार 24 जून रोजी दुपारी 2 वाजता उंबराव मिसाळ यांच्या व्यापारी संकुलासमोर घडली.सर्वात संतापजनक बाब म्हणजे, वाटंबरे ग्रामस्थ गेल्या 4 वर्षांपासून गावात अवैध दारू विक्री बंद करावी म्हणून पोलीस, तहसीलदार, उत्पादन शुल्क विभागाकडे वारंवार पाठपुरावा करत आहेत. सरपंच नामदेव पवार यांनी स्वतः अधिकाऱ्यांना लेखी कळवले होते. पण अवैध विक्री बंद होण्याऐवजी दिवसेंदिवस जोमाने सुरू होती. कालच्या मृत्यूनंतरच यंत्रणा खडबडून जागी झाली.उत्तम नकाते यांचा मृत्यू होताच तहसीलदार बाळूताई भागवत, पोलीस निरीक्षक विनोद घुगे, उत्पादन शुल्कचे अधिकारी पंकज कुमार व गडदे यांनी तात्काळ वाटंबरे गावात धाव घेतली. गावात छापा टाकून 32 हजार रुपये किमतीचा देशी-विदेशी दारूचा साठा जप्त केला. पण ग्रामस्थांचा सवाल आहे – “एकाचा जीव गेल्यावरच तुम्हाला जाग येते का? 4 वर्षे आम्ही काय रडगाणं गात होतो?”सांगोला ग्रामीण रुग्णालयाचे वैद्यकीय अधिकारी डॉ. पूजा साळे यांनी सांगितले की, “अतिमद्यप्राशन केल्याने रुग्ण जागीच बेशुद्ध होऊन पडला होता. रुग्णालयात आणण्यापूर्वीच त्याचा मृत्यू झाला होता.” पोलीस हवालदार अनिल बनसोडे यांनी अकस्मात मृत्यूची नोंद केली असून पुढील तपास सुरू आहे.गावकऱ्यांचा संताप : ‘पुढचा बळी कोणाचा?’
“आज उत्तम नकाते गेले. उद्या माझा नवरा जाईल, परवा कोणाचं पोरगं जाईल. गावात उघडपणे दारू विकली जाते. पोलीस येतात, हप्ता घेतात आणि जातात. कारवाई फक्त कागदावर होते. आता माणूस मेल्यावर दारू जप्त करून काय उपयोग?” असा संतप्त सवाल एका ग्रामस्थ महिलेने केला.
